الغياب

يلبِّّس من تحبّ"ثياب"
من وَرْد
والوَجْد
يعطي الذكريات اليابسة
نبْض"ومشاعر"
يكسي جفاف أحزانك الصفرا
ملامح من ندى وأعشاب
الغياب
مجنون يرسم
للشبابيك الضريرة
عيون خضرا
تخلّي شوك البعد وردة
والحصى لبلاب
الغياب لو تدري يفتح
"للخيال"أبواب
يعيد تشكيل الصور
ويجمِّل الأحباب
والحبيب اللي تحبّه
مهو نَفْس ذاك الحبيب
لو غاب..
في الغياب
الحبيب يصير أَجمل
الحبيب يصير أشهى
وما تشوف في من تحب
غير ما تحب
والخطايا
تصير هدايا ترتجيها
ويورق الغفران عندك
من سراب عتاب
في الغياب
الحبيب يصير أعذب
الحبيب يصير أقرب
يمتلي بوجهه مساك
تمتلي بنوره سماك
يمتلي باسمه نِداك
يصير كلّك
وكل شي له يوديك ويدلّك
تحسّْ كِنّه
ساكن في أوضح مراياك
وفي ظلك
وبلحظه ما تدري وش اللي
شجّر ايدين المدى
عِنّاب
لا ولا تدري وش اللي
حنّن الفرقا عليك
رقّت وخلّت حبيبك
في ظماك ينساب
لا ولا تدري وش اللي
يخلّي شوقك
دوم يفتش
في حقايب الوصال
ويسأل بلهفة عن اللي
من عند الحبيب لك جاب
وتسأله لو كان يقدر
ياخذ شوية هدايا للي غايب
بعض أغاني
تطرد الوحشة في صدره
وشال دافي للشتا
وشمس لليل الطويل
وسقف يحميه ومظلة
حتى لا يبتلّ شَعْره
لا"همى"حزن البعاد
والوجوه أغراب
وياخذ لخيمة رجاه
من رجاك أَطناب
الغياب
يشفِّف القلب ويسرِّج
في الحنايا شْهاب
يا حبيبي
غِيْب لو ودّك تغيب
في الغياب
تصير"فيني"حاضر أكثر
وقلبي رغم البعد يقدر
يوصلك من ألف سكّة
ويدخلك من ألف باب
الغياب.. وهَّاب