( خيوط الفجر )

الشاعرة رنين الذهب ترثي فقيدة الشعر النسائي الشاعرة الراحلة مستورة الأحمدي من خلال هذه القصيدة .. تقول:
ليه راحت كذا من غير كلمة وداع ؟=والفجر ينسج اخيوطه من احساسها
ليه هدت معاني الشعر قفرا جياع=مثلما جاع نزف الحرف كراسها
اهدت الصبح لون الليل والنور ضاع=بين أمرّين غيبتها على ناسها
عذرها إنّا بصيرتنا بقدر السماع=وأوكسجين الوطن قصّر عن انفاسها
راحت إبها سفينة عمر ماله شراع= بحر الأقدار غافلنا واخذ ماسها
ربي اجعل سكنها في الجنان الوساع=والشهاده في ليل القبر نبراسها
ربي إرحم جسدها تحت رمل البقاع=عقب فرقا عشيرتها ونوماسها
وألهم الصبر للقلب الصغير الشجاع=وارث المجد أديب الفخر جسّاسها
وارفق بحال زهرتها الغضيضه بساع=في دجى الفقد يارب البشر واسها
لنّ ماهي سهيره والخلايق هجاع=باتت الشمس دمعتها تحت راسها
واقبل الفجر ضايق ينشد المستطاع=ليه ماوادعتنا مثل هوجاسها؟