شعر مسكوب !

يا على لو حذفت الهم بالطوب=ما نكسر حلمي وحلم الغلابه
كثر ما صرت لاهل الحاجه جيوب=صار ما بيني وبيني طلابه
أزرع الورد واجني شوك مضروب=ليتني ما سقيت إلاّ الكتابه
ضحكة اريام احلا من أي مشروب=وبعض الاحيان من بعض القرابه
صبحها غير به غالب ومغلوب=وليلها ناهب القمرى نهابه
من لبست التعاسه والتعب ثوب=وكل الاحزان في عيني تشابه
عطرها لا نويت انساه واتوب=أحترق لين يا صلني جوابه
وان تغشاني احيا لو بعض نوب=أتضايق وانا كلي رحابه
وان نويت افرح بلقياه يا دوب=أفرح شوي واستحلي عذابه
كل ما راح صوب آجيه من صوب=ليتني آه واتنفس غيابه !
آه من هالفراغ المر ..مكتوب ..=أسكنه طيش واطارد سرابه
حبها ما هو إلاّ شعر مسكوب :=بالحنايا، وتتراقص صبابه
ما حلمت اتركه لا شك مغصوب=الله اللي عطانيه وغدابه
ليتني سكرٍ في ماه وآذوب=وان تبخرت يمطرني سحابه !
والصديق ان عطاك العلم مقلوب=كنّه اللي خذا والهم جابه
أصعب ايامي ليا جيت ابا اتوب=عن غلاها وتنهش بي ذيابه
يا علي يا علي والعمر محسوب=وش بالانسان لا ضيع شبابه
كل ما جيت درب آضيع دروب=كل ما اطق حلم يصك بابه
وقلبي اللي غدا للعالم قلوب=ما بقا ليل موحش ما سرابه !