أنا والا حرمتي؟!

بعض الازواج كنه مو مصدق ان عنده زوجة، يسمع بالمهايطية اللي يسولفون عن شكم الزوجة وسوالف سي السيد، وكل يوم يوقف قدام المراية يسأل نفسه من هو المسيطر انا والا حرمتي؟! ما ودي اصف بجنب الحريم لان منهن حريم كثيرات فيهن حقهن من قواة الراس والمعاند، بس بعض الازواج تلاقي يا زين تعامله مع زملائه في الاستراحة والعمل ويا شين اخلاقه مع زوجته وام عياله، كنهم ثنين في حلبة مصارعة، عاد هالايام، ايام رمضان المبارك، اكثر نفوس الازواج تصير شينة، ويكثر فيها الهواش وطق الزوجات، وكل الاسباب حول الاكل ومالاكل، ليش ما حطيتي بالشوربة لحم، ومن هالسوالف، اكثر تفكيرنا في بطونا الله لا يبلانا، وصار موضة عند كثير من شبابنا المتزوجين انه لا جاء يطلع من البيت لازم يخترع هوشة عشان يطول برا البيت بزعم انه زعلان، ويرجع للبيت وكل ريحته دخاخين و يرمي جثته على السرير ولا يبي يسمع من الزوجة المسكينة اي شي. الزوج عندنا لاجاء يتكلم عن حرمته ينسى انها امانه برقبته، كنها مرسولة عشان تنكد عليه!