ما حنّا خليين .. للشاعر عطا الله ممدوح

ماحنّا خليين .. وعلينا تمرّ ظروف
لكنّ ( الطلاقه في المحيّا ) لنا عاده
عساني من اللي تحفظ الطيب والمعروف
ولاني من اللي للمعاريف جحّاده
لو ان التعب مخلوف والا ماهو مخلوف
ما نندم على طيب له النفس معتاده
علشان كلمة كايدة من ثلاث حروف
نحث الخطا ونضاعف الجهد بزيادة
لو الطيب دايم بالتعب والعنا محفوف
على قد مانقدر مانقصر عن شداده
لا منا نوينا شي سقنا عليه حلوف
بدون العزايم ماحدن يبلغ مراده
لو القل بجيوشه علينا يسل سيوف
ما نحني له الهامه لو يوثّق قياده
نقول اننا بخير ونضيف ويجينا ضيوف
ونشيل الحمل عن صاحب الحمل لا كاده
قويين بالله غير خوفه ما نعرف خوف
لا من جيش طرواده ولا حصان طرواده
لا منا رضينا نطوّف اللي مهي بتطوف
ولا من زعلنا نقتل الحلم بمهاده
مانلعب على المستور نلعب على المكشوف
وظروف الحياه تزيدنا عزم وإراده
ماروح من الدنيا ما نلحق وراه حسوف
مدام الله اللي كافل الرزق لعباده