الدقايق

كل الفرح عشته معه في دقايق
ليت الدقايق طولت في حسابي
مير البلا كل البلا الحظ عايق
حتى معه عيا يمتع شبابي
لا غاب عني شب صدري حرايق
لا واعذاب القلب لا واعذابي
محروم من حبه ولا الجو رايق
مبعد بعيد وهم بعده غدا بي
هذا زمانً كل علمه يضايق
واللي مضى من هم زايد عتابي
يا الله يا عالم بسر الخلايق
بيحت سرً بالضماير طغى بي
ومناي حظً للتباشير سايق
يخط ميلاد الهوى في كتابي
مير البلا كل البلا الحظ عايق
عيا معي يفزع يمتع شبابي