لآلئ شعرية

دار الهواء فوق الشجر باندراجه
وانا هجوسي تتبعه كل ما راج
القلب نسمات العليل ابتهاجه
والفكر خلته الدواكيك مسهاج
فجٍ الخلا لا ضاق صدرك علاجه
يغنيك عن بعض المجالس والازعاج
سحابة البارح قفتها عجاجه
يلعب بها صلف الهواء مثل الامواج
هبت هبوب مدورين اللجاجه
يفرح بزلة صاحبه كل هراج
من غير سبه عاقدٍ لك حجاجه
لو إن ماله مع هل الطيب مدراج
اثر العوج دايم يحب العواجه
لو ينعدل يرجع لساسه وينعاج
ما يستوي طعم القراح وهماجه
ولا يستوي نقع الصفا مثل هداج
الله ولا منة محسّب خراجه
شين اللغا ومن البطر لابسٍ تاج
والله ما يذبحك يا كود حاجه
لا صار في وجهك حيا وانت محتاج
بالعسر يسر وللهموم انفراجه
يجيلها من والي العرش مخراج
ارفع يدينك للسما ثم ناجه
يظهرك لو دونك شرابيك واسياج