سراب

الشوق نكبه والجفا قطع الانفاس
والليل موحش والمسافه طويله
متزهبه همي على شداد عساس
بين الرجا والياس مالي حصيلة
ماطريت حبي لك ولاطريت للناس
واحساسي انك فيك حبٍّ مثيله
لكن تكابر وانت قدرك على الراس
وانا «مَرَه» وحمول وقتي ثقيله
اشيل همك واسهر الليل لا باس
لكن فراقك حمل مقدر اشيله
اشفق على شوفك ويمنعني الباس
والهرج يكفي عن كثيره قليله
اهديتك احروفي مضامين واحساس
وانا على طرياك نار و فتيله
رغم البطا رغم الزمن رغم الأرماس
باقي معي للحين صورة جميلة
حطيتها ضميتها بين الاقواس
أسهر عليها كل ليله و ليله
جيتك شموخ القافيه وانت نبراس
ب الهقوة اللي كل بارق تخيله
وانْت ادري انك للدجا ضو مقباس
تفرح بك اقلوبً حزينه عليله
وادري النهاية للغلا مالها ساس
الا سراب و همس ظلك دليله
اشب نور اكباس واطفي اكباس
وقدرك حفظته ب الرموش الظليله
اعذب من الهتان واغلى من الماس
والعمر مرة وانت مافيك حيله