لو ما تجي طرياك فالبال طرياك

تراي مازالت انتظر واتحراك
علك تجي في تالي الليل غادي
استقبل طيوفك وانا اقول حياك
مثل الكريم اللي لضيفه ينادي
لو ما تجي طرياك فالبال طرياك
تغدي بفكري معك في كل وادي
اراجع الماضي واحسب نواياك
واقول ما عينت علم وكادي
ترضى وتزعلني وانا ادور رضاك
وامشي واقول بسلم الاحباب عادي
يا بري حالي يوم اناظرك سواياك
تضحك وتغرس حربتك بالفوادي
ياللي شبيه البدر طلة محياك
والليل عن غرتك جاله سوادي
يا جامع انواع الحلا في حلاياك
وش لون تقتل نظرتك وانت هادي
ما أقدر على صدك ولا يمكن أنساك
عقبك عيوني ما تذوق الرقادي
رح وين ما تبغى وعود لمرباك
وانا انتظر جيتك مع كل بادي