القلوب

اثر القلوب تشيل شيء ٍ ما ينشاف
وتعطيك صدق احساسها من طرفها
ولا جيت تبحثها بها سمّ ٍ زعاف
لكنّ علام الغيوب يعرفها
قول الصراحة في حياتك ولا تخاف
وأترك هل الدنيا تعيش بترفها
وش خانة الدنيا بلا عدل وانصاف
كم نجهل الدنيا ونجهل قرفها
دنيا دنية تاليتها للاتلاف
والناس مشغولة بها من خرفها
ومن يطرد الدنيا تلقيه الاكتاف
وربحان من عنها عيونه حرفها
ارقى بطموحك فوق في راس مشراف
النفس ما تقبل تدنّس شرفها
ولا تلتفت لقلوب ناس ٍ ما هي نظاف
الناس من جاها بقوله جرفها
ومن فاز في جنة عدن مابه اخلاف
الله يبلغنا نفوز بغرفها
يا رب يا اللي بالمخاليق روّاف
ثبّت فؤاد اللي دموعه ذرفها
تم الكلام وخاطري شاف ما عاف
ومن خزنة افكاره بيوته صرفها
ولأن المجامل بعض الأحيان ميلاف
للي عرف طبع البشر واحترفها
لأن القلوب تشيل شيء ٍ ما ينشاف
وتعطيك صدق احساسها من طرفها