زلة الصاحب

بالغت بالتقدير من مبدأ الصمت
عن زلة الصاحب سمو وحشيمه
عطيت وأجزلت العطا ماتكلمت
مديت قلبٍ يمطِر الود ديمه
جيتك أخبي عبرتي وان تبسّمت
تلمح على وجهي تقاسيم ريمه
رغم التعب رغم الذي منه ما نمت
رغم السهر شلتك على كف غيمه
ماهان قدرك لا تشكيت واقسمت
ان الظروف أحيان جداً أليمه
تصرخ جروحك فيك وأنا تألمت
أرخصت لك روحٍ وربي عظيمه
فطرتك إحساس المحبه وأنا صمت
أهديتك افراحٍ بعمري يتيمه
واليوم في وادي العنا داخلي همت
ذوقتني ياصاح طعم الهزيمه
خذلتني باسلوب منّه تعلمت
لو تِرخِص العشره ترى ليّ قيمه
وأبقى مثل ماكنت وأترفّع وشمت
مادام باقي للوفا فيّ شيمه
لكن تذكر دامت أفراحك ودمت
ماعاد كفي مثل الأول كريمه