ياشين توديعه وياحر فرقاه

قصيدة في رثاء الأخ بندر بن محمد موزان الشمري رحمه الله
ياشين توديعه وياحر فرقاه
يومن مضى ياالله لنا لا تعيده
لو أنها بالمال والفعل نفداه
مير القدر ما عنه لوما نريده
بعض العرب ما تفقده غير عذراه
و بعض العرب تبكيه كل البديده
يبكي عليه اللي من البعد ينصاه
ويبكيه من خاو هذاك الوليده
وجهه بشوش وبس يضحك محياه
كثر ارجال مجلسه ما تكيده
دايم هلا من قبل عرفه المن جاه
ووده يقدم كل ما حاشت يده
ما كثر ماله في بنوك المراباه
زين النبأ والبذل هذا رصيده
ولابدنا من يوم نمشي ممشاه
لو زانت الأيام ما هي بعيده
يا رب حسن الخاتمة والمعافاه
نرجيك عفوك يا مكون عبيده