جل الفعول

يا اللي تحسب الوقت دايم على الكيف
الوقت لو طوَل ترى له نهايه
جل الفعول توصلك للمشاريف
وتكون لك مع طول الايام رايه
طاعة رفيع الشان مجري التصاريف
غايه لكل إنسان يبغى الهدايه
والوالدينك حق من دون تحريف
اخفض جناح الذل جهر وخفايه
تراهم ابدى بالوفا والمعاريف
اغلى تجاره كان تبغى الوصايه
واياك لا تسمع كلام الملاقيف
اهل النفوس اللي تحب الوشايه
جنب طريق اللاش قبل التحاسيف
نصيحةٍ مني ولاهي دعايه
خلك معا درب الرجال العواريف
واسلك طريق الطيب من طيب غايه
نواف بن محمد الصخابرة