عواكيس

•أين صالح النعيمة من فيلم حلم84 وين الأنصاف يامعكوس والله حرام عليهم ؟
نواف من القصيم
*التعصب يسوي اكثر البطولات حرفوها ماسلمت منهم!
•عزيزي معوكس اقترح على أصحاب الشأن في الهلال التعاقد مع باوزا لكي يحصد جميع البطولات خاصة الخارجية؟
اخوك المشجع النصراوي الوفي لافي صالح العنزي
*وينه ماحصد عندكم ولا الحصاده ماكلها برد العريجا !
•الأخ معكوس وش رأيك إذا كان "البعض" يلعب ضد الهلال نخلي الحكام 11 ولاعبي الهلال 3 حراس ودفاع ونخلي الخصم يشوت حتى لا يزعل؟
محماس بن نجر الدوسري - الجبيل
* السير شوقي راس مندي قصدي راس حربه !
•صباح الورد والدفء والبرد يابو العواكيس شدتني صورة الطفل اللي شايله الداهية ريفو، سؤالي وش اسمه وين ساكن متزوج او عزوبي موظف او عاطل سامحني مجرد فضول بس؟
بدر اليعقوب- القيصومة
*تراه اكبر منك والصورة من سنة جدي!
•عزيزي المحترم معوكس والله ما أقول إلا مثل ما قال فارس عوض( يارباه) على العقوبات المخجلة، شغب الجماهير عقوبة ماديه ما الفائدة؟
معاذالحميد - مرات
*لا وهناك من قال اللي صار طبيعي وياعيني على اللبن الطبيعي!
•المحترم معكوس دورينا اسمه دوري المحترفين واللي رافع ضغطي ما طبقنا الاحتراف، ثلاثة مدربين استقالوا في وقت واحد، والتحكيم رايح فيها وأصبح دوري ضربات جزاء، سوالي لك متى بنصير مثل الدوري الأوروبي؟
أحمد صالح الماكر
*الى حجت البقر على قرونها!
•يامعكوس ياليتك مقدم برنامج عشان تزبط لي حفل اعتزال وأعطيك نسبة من الحفل.
نواف ابوالمعاطي
*عقب تدسيم الشوارب ماعاد فيه مقدمين اللي مصخن واللي مشغول بالخواتم !
•أخ معوكس: بما أنك تنتمي للوسط الرياضي ما شعورك النفسي والعاطفي بعد عودة منصور البلوي للإعلام ومدرجات فريق الاتحاد ؟
سفير الحلة – الخبراء
*نفس شعور اللاعب اللي اعلن عنه ابوالشباب!
•وش رأيك يامعوكس تصير مذيع وأنا صحفي أي شخصية تستضيفها اكتب عنها وأرشك يعني بالعربي أنت تثبت وأنا الشوت؟
خالد الدهمشي - عرعر
*مذيع في ال بي بي سي!
ريفالينو
•والله زمان يامعوكس الهلال كان مضرب المثل بالهدوء الآن ما غير ملاسنات، رح أنت إلا ما أروح وش القصة، يا أخي اقضوا على حوائجكم بالكتمان؟
احمد الناجي - بقعاء
*من عقب قصة المسرح والعروض مستمرة والدخول مجاناً!
•صراحة يامعوكس إللي قاله عمران العمران شيء مرفوض لا يمكن تصديقه واعتقد انه من نسج الخيال؟
نايف المرشدي - الدمام
* واللي قاله علي يزيد أفظع وسعادة النايب يحذر من الاعلام!
•أتوقع يامعوكس ان محمد الراشد هو الصفقة اللي أعلن عنها ابو ثامر، دقق بالموضوع ورايح تلقى الخبر؟
نعيم باريان - جدة
*الخبر عند جوزيه!
•ماهو شعورك يامعوكس والأخضر يدشن يوم الأحد كأس آسيا، يارب وفق نجومنا؟
محمد الدلبحي- الدوادمي
*شعوري واضح وماعندي قراطيس مشبوهة!
•ليش يامعوكس بعض اعضاء البرنامج التعيس غضب من كلام عمران العمران يوم قال: ان عبدالغني يلعب ببلاش؟
جمال الخرعبي - الطائف
*يبون الشور شورك !
**صاحب المليون رساله ابو العواكيس تحيه وبعد
تتوقع النصر اصبح في الثقافه عالمي وبعد عشر سنوات يحتفل بالعالمية
صديقك - بندر العصاي - عنيزة
*اكيد بيعرضونها في «ثقافية» زمان!
**قاهرهم وحابس دمهم ابو العواكيس تحيه وبعد
ماهو رايك باللي ماخذ في نفسه انه صحفي وزعلان من صراحة مدرب الاتحاد جوزيه ويصف اللي قابله أنه أفطر على بصل
*الله يرحم حاله اللي يفطر مع اللي يدافع عنه معصوب ومنتو!
**الحبيب ابوالعواكيس لك حبي وتقديري
وش برايك القرار الخاطىء من ادارة الهلال
عبدالملك المرشد - عرقة الغربية
*ماغيره تصريفة ابو دعيع الله يجازي اللي كان السبب وبعدين ودي اسألك من كبر عرقة شرقيه وغربيه على بالك واشنطن!
**الغالي ابو العواكيس
بعد فوز النصر بكاس الثقافة وين يتاهل
صديقك - حمد الدوسري
يتأهل لبرنامج حروف وألوف في رمضان الجاي