ماتفارق خيالي

ان رحت غالي ياهوى البال وان جيت
يبقى مكانك داخل القلب غالي
غلاك عندي ماتقيّد بتوقيت
من حيث ماوجهت تطري ببالي
وكل ماطرا ذكرك وبالبال مريت
العالم الله صرت كنّي لحالي
اسهر مع الهاجوس واقول ياليت
اهنا بقربك ياحسين الدلالي
ياكثر ماتطري عليّه وسجّيت
وسهرت مع ذكراك طول الليالي
زبدة كلامي ومقصدي وافهم البيت
يامن مكانك داخل الروح عالي
اقبلت والا ياهوى البال اقفيت
صورتك دايم ماتفارق خيالي
عادل بن سليمان المخلفي