صوت الصورة

يا طير ياللي كاملات مزاياك
صدت الحباري يا قوي العزومي
أنا أشهد إنك لأبرق الريش صكاك
خليتها يا طير تحتك تعومي
جهز بن فالح العطاوي، الرياض
يا محلاء القرناس بارضٍ بها صيد
وشوف الحباري.. والفياض العذيه
فوق الجيوب اللي تبوج الجراهيد
والجو هادي والتوانك مليه
فايز فرحان السويلم
أشقر الجنحان عشاه الحباري
يوم طير البوم أمرح ما تعشى
ما بغى الكروان ولا الصفاري
بشر اللي قانصن به ويتمشى
شجعان بن سعود العتيبي
بسم الله الرحمن والله أكبر
والحمد لله حلال يا حلال
هذا كلام الطير والفعل اعبر
لكن لو انه يمين وهي شمال
علي بن ثابت القحطاني
يا زين شوف الخرب ومن حوله الطير
في صيدته فيها المتاع وسعاده
الحر غير ويا جد اليوم تقدير
يسعد به الصقار لا جا هداده
محمد بن عبدالعزيز الخنيفر
الوقت برد وصار الناس
للبر والصيد مشتقاه
الله على اللي صادها القرناس
من عقب ما هي بالجناحين خفاقه
عبدالكريم عبدالرحمن السلوم
ما يجيد الصيد كود حراً نداوي
اشقراً ما خالطه طير الرخامه
خبطته للخرب أهوى به رهاوي
لازمه تحت المخالب في زعامه
حمد عبدالله الوايلي
يا حظ من حطك على الكف يا طير
وقنص بك الصمان ويا الشمالي
لا عرضت بالصبح أو حزة عصير
عز الله إني برفع الراس عالي
فالح فلاح الرشيدي
يا هل الصقاره ابتدت هدت الطير
طيري قبل عشرين ليله دعيته
وهلحين جاهز واسمعوا يالصقاقير
ترى المعاند والتحدي نويته
هليل فرحان الشمري، الرياض
سلمت يا طير السعد يا كحيلان
مع الفعل يا زين والله مواريك
وقت الهدد تعطي عن الذكر برهان
وتملا بعلامات الرضا وجه راعيك
محمد عبدالعزيز المناع، تمير
هديت أنا بركان من عقب طيرين
على حبارى والهواتهز والاغصان
طلع عليها خفو ما شفتها لين
حول بها في عالي العرق بركان
حمد مطر الرشيدي، الرياض
وش عاد لو طرتي بعيدٍ بالافاق
واصبح عجاج الجو بيني وبينك
ترى النتيجه مخلبٍ وسط الاعماق
والثانيه بالقاع يوسم جبينك
مقيم بن مرزوق السبيعي
الكف الأيسر فوق عنق الفريسه
والموس من كفه يجز الشرايين
أكله طري ما ذاق يوم فطيسه
أهل التميز في الجوارح شياهين
سعود بن عبدالعزيز الهزاع، نعام
الصقر وقع صايداً له فريسه
ويصيح باعلى الصوت داعٍ لراعيه
حضيض من طيره جلب له نفيسه
عشاه منها واتجه يم داعيه
عبدالله بن إبراهيم العبودي
يالحباري ما تروح من يدين الأبطال
الصقور الغايره ما نبي غيرها
في نظرتك هيبة ويضربك أمثال
يا طير حوران في يدينك جرها
فارس فاضل الطلوحي
صورة العدد
* نرحب بمشاركاتكم الشعرية حتى مساء الاثنين
على الفاكس رقم (4871070)
أو الايميل الخاص بصفحة الخزامى:
rb-khozama@alriyadh.com
زاوية (صوت الصورة).. ويا هلا.