الله يجبر كسركم يا خوالي

لا والله ألا راح منا فقيده
ليت الليالي مهلت له ليالي
مير المنايا علمها ما تعيده
لو نرخص الغالي على شان غالي
ما راح واحد راح منا بديده
حيد تذرّى في ذراه الرجالي
وقت مضى يوم الحياة النكيده
ويوم الليالي بين مر وحالي
والناس كانوا في حياة زهيده
أطيبهم اللي في محله دلالي
قدّام كل يفتخر في رصيده
والزاد درّ معبّسات الشمالي
كم ليلة والبرد يضرس جليده
والبرق يبرق في عروض الخيالي
تعاهدوه أهل الديار البعيده
وتواجهوا عنده كرام السبالي
وكم مرة جت بين ربعه مكيده
وسعى لحل المشكلة والشكالي
بالعرف والحكمة والأرياء السديده
وبحنكته وألا بخشم الريالي
وقدّام لا أختم بيوت القصيده
الله يجبر كسركم يا خوالي
الشاعر محمد خربوش العضياني
@ هذه القصيدة رثاءُ في المرحوم بإذن الله متعب بن حسن العضياني.