مناب للي ما يبيني ملفّي

من تل كفه لا يحطه بكفي
عساه مثل مقيط يوم اطلق رشاه
مناب عن كره البغيض متخفي
مالي مكاسب منه حتى اترجاه
مهوب أخوي اللي يوقف بصفي
عضيدي اللي حزة الضيق ابنخاه
لي صار شفّه ما يجي مثل شفي
جاملت عشر أيام لين اني أنساه
قد قيل يخسر من طرد له مقفي
وانا بايد واحد هاذي ارياه
مناب للي ما يبيني ملفي
وان جاب ذكره واحدٍ ما اتقفاه
لا صار ما هو بالسلام امتحفي
اعطي البشاره لا تخفى بفرقاه
احدٍ يشب النار واحد يطفي
وقتٍ تهددنا مصايب خفاياه
يفتح ملفاتٍ ويطوي ملفي
ويسجل السيه علي ضد حسناه
نصحي لابو وجهين ما هومكفي
يمشي على عقله وعرفه ومبداه