جعل ملفى شيخنا حسن نزوله

قصيدة رثاء في الفقيد الشيخ عبدالعزيز بن خالد بن جامع - رحمه الله -
مل قلب ضاق بالهنداب جوله
من يمين القلب ولا من شماله
قلبي اللي واجم غفوة ذهوله
والدموع الزرق ما تترك مجاله
راح شيخ ما يعوض بالسهوله
يوم غابت بابن جامع لياله
شيخنا مثل النداوي في فعوله
ومن معالم هيبته عز وجماله
مثل أجا وطويق لو تكبر حموله
شالها شيل المقنع واحتماله
ومن يقول الطيب ما بركت ذلوله
ما تقهوى الجود من صافي دلاله
بالذهب اسمه ليا عدت زحوله
في جبين المجد نامي وانتماله
في عتيبه ذايع الصيت وقبوله
لين نوخ زحل الارياء كل قاله
ما اقوله كل خلقه الله تقوله
من رجال الدين ورجال الشكاله
جعل ملفى شيخنا حسن نزوله
مع هل الرايات من صحبه واله
والعوض لنا العوض بعد شبوله
لو يشين بنا الزمن نلقى عياله
والجوامع حرزنا في كل جوله
لا ترجل فارس جانا بداله
جامع اللي للمكارم والبطوله
من دروس العود وافية خصاله
صيد فكره من على عهد الطفوله
لا ورد يروي ولا تقصر حباله
وفي ختام القول لمحمد رسوله
الصلاه ولله الواحد كماله
جري بن سعد السرحان الرويس
الدوادمي