ألا يا مطالع صورةٍ تعجب الانظار ما بين الضلوع اللي تِحدّد بها الديرة

ألا يا مطالع صورةٍ تعجب الانظار
ما بين الضلوع اللي تِحدّد بها الديرة
ترى ذي منازل نجد إذا جت لها الامطار
وكثّر عليها الله من الناشيةْ خيره
وحتّى الجبل ينبت وتظهر به الازهار
عسى ما يشتّت سايق المور عن سيره
صحيح انّ ما فيها بحيرات والّا انهار
ولكن بها الزلزال يا قلّ تأثيره
لعلّ السياحة تنتشر في ربوع الدار
واذا شافها السايح يكثّر بتصويره
محمد مقحم المقحم - الرياض
وروعة زهورٍ مِعجِزه بالتِّواصيف
ياليتني واللي وقف فيها جِمِيعِي
سَج القدم فيها بقليل التِّكاليف
أرضٍ بَها الخيرات مِن ربي طبيعي
معروفةٍ لَلكل مِن دون تعريف
سعود عائش الحربي - جدة
وقت الخزامى ربيعه فات
تزهاه الالوان في الصوره
يسعد به الزاير الكشات
وسط الطبيعة ومنظوره
تصوير جوال وسناب شات
وفي وقته الأرض ممطورة
معه الوسم وابرك الحزات
بفياض في نجد مشهورة
سليمان بن عبدالعزيز السنيدي - الرياض
فلاة ربي نبتها الديدحاني
فيها الزهور مشكلاتٍ بالالوان
في بر لا يوجد عليها المباني
ترعى بها الانعام وحيان غزلان
قليل فيها جُرة المودماني
لكن يمشيها وهوّه بمان
في وقتنا الزاهر بهذا الزماني
انعم علينا ربنا رب الاحسان
محمد عبدالله الشهري - جبل اثرب
موسم ربيع وزاهر العشب باين
عشب الخزامى فارع في طوله
وغطى على الروضه بلون زاين
ياما حلى الكشته ليا خذت جوله
تشم ريح العشب والجو متباين
يا ليت منهو عليه وساكن حوله
منظر طبيعي يسر العين والعاين
خوة نشاما تشب النار مشعوله
حمد عبدالله الوايلي - حوطة سدير
مشتاق للبر والمشي فيه
والارض رويانه والعشب راهي
والجيب فكسار ليا حل طاريه
ومكمله راعية دله وبراد شاهي
صالح البشري