يالله من نوّ ٍ مزونه مراديف

يالله من نوّ ٍمزونه مراديف
يضفي خياله من جنوب وْشمالي
ينشي من القبله إليا ساحل السيف
ويمطر على شبه الجزيرة ليالي
ومن هلّة الوسمي إليا حسبة الصيف
وعقبه من الكنّه تسيل الدحالي
يسقي الفياض الممحله والشفا شيف
وينبت سهلْها ويخضرن الجبالي
تِسمن به اللّي للمودة مواليف
جرد الرقاب معبسات الشمالي
عقب الضعف صارت سمانٍ مشاعيف
ويردم عليهن الشحم له ظلالي
ما عاد يا سلطان نطري المعاليف
هذا مرامي يا حفيد الرجالي
ما أقلّد اللّي يَم باريس وجنيف
بدارٍ هواها غايتي شَف بالي
ينعش نسيمه لو يجيبه عواصيف
في مدحها يا ناس ماني مبالي
شعر: عبدالله بن عفتان الشَعيفاني