نهار موادعه

ليته نهار موادعه قال ما بيك
لكن بدلها كرّر (أنته حبيبي)
وليته يجي عندي بذكراه تشكيك
وأنساه والنسيان ما فيه عيبي
لكن يا قلب القشر وقّعت فيك
وانته جنابك للمواجع خصيبي
يا قلب خذها صادقه من محاكيك
طهرك جعل تنهيدتك من نصيبي
لك ونةٍ عند المساء ما تخليك
ولو غابت نجوم المساء ما تغيبي
وين أنت؟ يا اللي يدهل البال طاريك
يا جرحي الغاير ولمسة طبيبي
عينت قلبٍ من فواده مخاويك
هو ضاع ولاّ من حنانك قريبي
غلاك عندي تقل تبنيه بايديك
بين الصبابه والخيال الرحيبي
وكل الخفايا تحت حبك مماليك
في ذمتي فالقلب مالك طليبي
مير الغرابه فالبكا يوم أنا أبكيك
متعافياً يبكي عليه الصويبي!
خالد البقمي