التواضع له حدود

وين الخيال اللي له بروق ورعود
يقطع ضما الضميان والقلب يحييه
نسمت هوى الغربي أليا ذعذع النود
تدخل على قلبي مغذي يغذيه
واداعب الأفكار بشويش ياسعود
وطير المثايل داعي الفكر يدعيه
دام القلم موجود والفكر موجود
اصخر الأمثال والعلم أثنيه
للي يعرف العلم غاية ومقصود
دايم لبيب القلب بالعقل احاكيه
معنى ومبدا عقد والعقد معقود
اسري الهاجس بفكري واسريه
نقدر نقول ان التواضع له حدود
والسبه أن الوقت فيه وملافيه
لقيت من به نقص يبحث عن الزود
تجيه متواضع ويحسبك ترجيه
هذا يقين انه على حد محدود
والناس ماتجهل طبيعي تعاديه
بس المهم البيض ماهي كما السود
ياللي تجيب العلم ليتك توديه
مانخسر العاقل علشان مقرود
لوجاب علم ما يمشى نمشيه
هذي سياستنا على الهون والكود
أليا بدينا العلم بالعرف ننهيه
ماهو غريب أن الولد يقنع العود
ترى الغريبه فاقد الشي يعطيه