غرني لمعة غرورك

ياحبيبي حبك اللي ساكن وسط الحنايا
ساكن وسط الضماير لحظة الحب ومثوله
ياحبيبي لا تخجلني ببسمات الثنايا
وأنت تعرفني أضيع بنظر العين الفتوله
والخلايا في عروقي ترتجف كل الخلايا
ترتعش لك من شعوري ونظرة العين الخجوله
بس بالتالي عرفتك يوم سويت السوايا
ورغم ما تسوي تركتك وما توقفت بسهوله
وش علامك قمت تطعن في حشايا
كنك موصي بطعني ولك على الطعنة عموله
من عرفتك مخلص لك ما حصل مني خطايا
وانت في درب الخطيه روَّحت رجله عجوله
تنثر همومك بقلبي في الوريد وفي الزوايا
لين سقت العطف يمك وانتخي للي يزوله
وطبعك التافه عرفته وبان لي كل الخفايا
ابتعد ما ابي كلامك ما ابي شي تقوله
غرني لمعة غرورك وخلت بك بعض النوايا
لين نفسي اقنعتني وقت عاذل مع عذوله
نفسي ما ترضى الهزيمة رغم عذبات السجايا
وفيه في قلبي مواقع تحتدم فيها الرجوله
لا تحسبن إن التبسم لو حصل بعض الهدايا
يملك القلب المخضرم قلبي ما تقدر تنوله
عبدالله صبيح الشراري