نشرنا في الأسبوع الماضي لغزاً كتبه الشاعر ناصر المسيميري يقول فيه: ياويش بنت يا عرب تشرب ولا تاكل طعام مشروبها ماكولها ياربع من يفطن لها بدايته ورعٍ صغير وصار بنت بالتمام بنت ولا به فايده يا من يجين بحلها وجاءت الحلول الصحيحة كما يلي، علماً بأن الفائز الأول هو محمد عبدالكريم الغزي والثاني هو سرور سفاح المطيري والثالث هو خالد سليمان الجريش. البرق يضحك بالسماء والسيل يرقص بالغمام والعشب الياهب الوفاء ضم الزهور أوفلها ياهل الجزيرة شفت للنخوة علم فوق السنام عاداتكم يا أهل الوفاء انتم لها وأهل لها عاد الجمل لو هو ثلاث اميه لتر مدري جرام ما يروى اعروق القراد الضامية وايبلها الفائز الأول: محمد عبدالكريم الغزي الزلفي ********* أبعث لكم مع التحية والمحبة والسلام الحل,, كله طامعٍ في كتب ناصر كلها البنت يالربع احلمه معلوم ما فيها كلام يا فاتلٍ جزل المعاني عندنا نقضٍ لها الفائز الثاني :سرور سفاح المطيري المذنب ********* يا مرحبا وأهلاً هلا وتحيةٍ عقب السلام للي يجيب الغاز محبوكة ويطلب حلها اللغز واضح بالبعير إود وّره تحت السنام قردانها من دمها ذا قول منهو دلّها الفائز الثالث: أيمن عبدالله الخميس الزلفي ********* عند العرب,, يابن العرب معروفةٍ ما به كلام مشروبها دمٍ حمر بين عليها كلها يفطن لها راع البعير,, واللي يحب ام النسام يقتص بيديه (الحَلَم) من خوف لا يستلها خلف الأسيد الشراري ********* يا صاحبي خذ حلنا بالمعرفة فوق التمام أبختصر في نظمها يا صاحبي خذ حلها وصف البيوت الوافيه لاثبتت فيها وسام هي الحلم وازوالها بأعمالها واشكالها خالد سليمان الجريش الرياض ********* يا مرحبا وأعداد ماهلت هماليل الغمام باللي نشرلغز الجزيره والدروب أندلها اللغز واضح يالمسيميري ولا فيها كلام (قراد) ذاك الورع (وأحلمةٍ) وهذا حلها مبارك بن مشراف الجروي المزاحمية ********* أهلا هلا بك مرحبا بعد التحية والسلام يا شاعر جاب البيوت لقاري ما ملها اللغز يلقى له وجودٍ في بهيمه فالسنام حمنانة تجي من قرادٍ وهذا حلها بالحل هذي جهدتي والمجتهد لك مايلام كأنه صحيحٍ حلنا عطن الجوايز كلها عبدالله بن صالح الدغيم الزلفي ********* لغزٍ ليا اقبل صارله قيمة وشيمة وحترام مليان محكم في معانيه الجميلة كلها بيتين ما تملأ كفوف اهل التشره والملام يا بو حمد غيرك ليا حذفت بيوتي من لها شفت القراد اللي على ورك الجمل عيا ينام والجائزة مني لين هزاع قبل نفلها الأيمن ********* قريت لغز بالجزيرة واضحٍ ما به كلام والبنت يا ناصر ترى حنا نجيك ابحلها بنت الحلم تشرب من الدم وبها روح او تنام اصله قراد بالقديم ولا لقينا ادواً لها علي رشيد الرشيد ********* يا مرحبا بك يا لمسيميري عدد وبل الغمام ترحيبة مخصوصة وانته بعد كفوٍ لها وان كان تبغى حل لغزك يوم جبته بانتظام اقراد ثم صار حلمه جتك المعاني كلها عطاالله بن سليمان العطاالله ********* يامرحبا بك يا هلا بك عد ما غنّا الحمام والغاز ناصر وافيه يالربع والله كلها والحل جبته مثل ما وصّفه ناصر بالتمام وهي الحلمه اللي تعل الابل ياالله علّها محمد بن سعد بن غشام آل جناح القويعية ********* ياهل العقول النيرة مني لكم كل احترام يا معشر التحرير يارواد صفحات الجزيرة كلها البنت هاذي زادها من دم مردوم السنام ياالله عسى فال المسيميري مهو فالٍ لها حمود بن جعيثن العطاوي عفيف ********* سلام يا اهل المعرفة والفكر والمعنى سلام تحية يفضي على عصم الشوارب ظلها البنت يا ناصر تشيل الدم مافيها عظام تمشي على ورك النجيبة والحلمه حلها نافع الحربي الرياض ********* يا مرحبا يا شاعر اللي بالمعاني مستهام اللي تعلى في طويل المعرفة واحتلها الحل عندي وحلمه حله وهي ام السقام تشرب من جلود المطايا والعوافي تسلها عبدالرحمن محمد المقباس الخرج ********* الأولة حييت يا ناصر ومني لك سلام والثانية بيارق الابداع دايم فلها البنت من عقب القراد,, احلمه ما فيها كلام أقولها واللي عقد روس الحبال يحلها فهد الجروان الزلفي ********* لغز المسيميري نحله من مضامين الكلام بعد السلام وبعد تقديم التحايا كلها لبنت مبداها قراد ولا استوى عمره تمام حتى بدت باسم جديد انثى الحلم اسم لها عبيدالله جهاد العنزي الرياض ********* يا شاعر الالغاز,, منا تستحق افخر وسام وايضا شهادة عرف من عند العوارف كلها لاجلك عطيت اللغز ياناصر عنايه واهتمام واصبح (حلمةٍ) ما يغر العارفه وصفٍ لها زهران عون الله المطيري ********* لك ياالحميدي والمسيميري تحية واحترام وايضا لشعار الجزيرة والجزيرة كلها ترى القراد إليا كبر يصير بنت للاكلام هذا كلام اللي قراها بالعيون ودلها راشد مرشد المحى عنيزة ********* يا مرحبا يا مسهلا تعداد من صلى وصام ياللي نشد عن ذاهبة واللي قدر يحلّها يا هل ترى كل النعم تصير في حال انهزام إن جاها قرد بجلدها بالله وش يحصلّها سعد بن مويزر بن مشعان البدراني ********* يا مرحبا يمن بدع لغزٍ مكمل بالتمام صاغه وعقد شفرته ماكل شخص يحلها ترى القراد اليا كبر وارتاح في أمن وسلام يصبح (حلمةٍ) والدبش من فعلها تملها محمد بن حمد البدر الزلفي ********* لمحرر الصفحة والشاعر تحية واحترام والبنت ياناصر لزوم انا نجيك بحلها ذيك (حلمه) يا شاعر الالغاز ما فيه كلام وان كان اصابت ناقتك بالله وشتعمل لها مفرح علي الحربي بريدة ********* اللغز يا ناصر ظهر قرب الجمل قرب الجمل أحد يسميه حلمه واحد يسميه الخمل مأكولها مشروبها هو دمها اللي مصته من صغرها لى كبرها بنت قليله فايده سعد الكثيري
