ورقة قديمة

يا جر قلبي جر لدن الغصوني
غصون سدر جره السيل جرا
واهله من أول بالورق يورقوني
على غدير تحته الما يقرا
على الذي مشيه تخط بهوني
والعصر من بين الفريقين مرا
لا والله إلا بالهوى هو جروني
هجر به الحيلات عيت تسرا
لا مبعد عنهم ولا قربوني
ولا عايف منهم ولاني مورا
وأكثر عذاب القلب يوم سنحوني
بيح بصبري لو بغيت اتدرا
لا ضاق صدري قمت اباري الظعون
كني غرير بالدلوهة مضرا
وقلبي عليه اشفق وتبكي عيوني
والحال من ود الحبيب تبرا
يا عزتالي من تفرق شطوني
يعزا لي ارمي بالسلب واتعرا
ان مت في خد بعيد انقلوني
على هدي الزمل مشيه تدرا
ان مت.. في دافي حشاه ادفنوني
في مستكن الروح مهوب برا
بين النهود وقد روس القرون
عن الهبايب مستكن مذرا
ياليتهم بالحب ما ولعوني
كان ابعدوا عني بخير وشرا
والا انهم يوم انهم ولعوني
خلوني اقضي عازتي واتدرا
ويا ليتهم في الدرب ما واجهوني
ويا ليتهم ما زادوا الحر حرا
ويا ليتهم عن حاجتي سايلوني
يوم اني اقعد عندهم واتحرا
ويا ليتهم من زادهم ما اطعموني
انا على زاد اليتيم اتجرا
لا قربوا مني ولا بعدوني
ولا ميس منهم ولاني مورا
الخد برق في علو المزون
تقول براق من الصيف سرا
وقفت عنده شايحات عيوني
كني غرير باللهاوي مضرا
دخيل الله مرضي الدجيما الروقي