رسالة وقصيدة مجاراة

المكرم الأستاذ الحميدي الحربي الموقر
رئيس القسم الشعبي في صحيفة الجزيرة
السلام عليكم ورحمة الله وبركاته..
قرأت في الأسبوع الماضي قصيدة بعنوان (در الأوهام) للشاعر فاروق الكسر وقد جاريتها بهذه الأبيات المتواضعة، أتمنى من سعادتكم نشرها في حال أنها كانت تليق بجمال صفحتكم وما ينشر فيها، هذا ولكم فائق الاحترام والتقدير.
الكسر كيف دلة الكيف ثم شاش
وقام يتغزل لين سوى وشاويش
حرك شعورٍ بين الأضلاع جياش
وخلى عيوني من سهرهن مشاويش
يابو فهد من غير تكليف وابلاش
هو ليش يوم تحرك القلب هو ليش
وراك تنعش عشبة الخافق انعاش
وتحيي غرام فالمعاليق قد عيش
يالكسر هاك من الشعر عرش عراش
من عقب ما خليت فيها عراميش
هاك المجارى من رصيد الغزل كاش
غشنة شعر ماهيب رش ورشاريش
أبذكر اللي حبها فالحشا عاش
ومنوشٍ قلبي عطيب المناويش
بمغيزلن كنه تماتيك رشاش
أبو رموشٍ كنها صفت الريش
يا عنق ريمٍ ذاره الريح وانحاش
مدري طلوع الشمس ذاره طواريش
كني عليها عقب مضمى ومعطاش
مسبوق كفٍ راع من عقب توحيش
عقب اعتناق الروس عود على ماش
خيش على لوح زهته الدناديش
من عقب شم النيف خطوه بعشاش
وعاقوه بسبوقٍ وبرقع وتهميش
واللي غلاها ساق فالقلب واحتاش
بنت الرجال الطيبين المداغيش
يلومني في حبها الخبل واللاش
وأنا عليها أحن وأموت وأعيش