الزين المستور

من يلوم اللي بصوته على الهجعة جهر
في ظلام الليل والسالفه غنابها
ظامي العشاق ما بات لو يشرب نهر
والطواري شرعت بالخفوق ابوابها
كل ما هيجنت بالقاف واشتد السهر
قامت ابيات القصيدة تعوج رقابها
قمت اشكلها على الطرق واصهرها صهر
عقد عذراً صابغ بالكفوف خضابها
والظروف احدها حد واقهرها قهر
والمخاطر في سبيل الغلاء ما هابها
وانت ياللي ترخص الروح لعيونك مهر
قم تدلل واسكن العين بين اهدابها
يالعفيف اللي من الستر زينك ما شتهر
درة سباحها ينتهي ما جابها
الليالي يومها عام والساعة شهر
ما تطيق النفس يا صاح بعد احبابها
والدهر يومين ما يختلف طبع الدهر
عل من صافي لياليك لا تظمابها
عادة الدنيا تقلب على بطن وظهر
ما صفت دنياك دائم تخون اصحابها