المراجل ورث

يا الله انك تجمل اللي يدور للجميل
ولو يموت اجويع نفسه حشا ما ذلها
عايش في عز نفسه ولا يمشي ذليل
يشعب اركابه لدرب العلاء ويدلها
بالمعزه معتلى في حجي رجم طويل
الأصل والفصل شجرة يظلل ظلها
طبع ابوه وطبع عمه وجدانه دليل
للفخر والمدح وطبوعهم ما ملها
المراجل ورث تبقى لجيل عقب جيل
ذا الصحيح ومن بسطها ما هو بيغلها
عزتي للي تجي حاجته عند البخيل
البخيل اللي علومه ما تذكر خلها
يا هواجس بفكري تجي في كل ليل
طبعها في كل ليل تجي في حلها
والهموم إلها ضميري مبيت او مقيل
قمت اخفيها ولا ابغي العرب تفطن لها
العقد قامت تكاثر ولا فاليد حيل
وكل عقده بيد رب الخلايق حلها
اشهد ان التجربة ما لها عندي مثيل
والتجارب رأس مال المجرب كلها
والتجارب وضحت لي ولو أنها قليل
وكشفتلي طبع ناس تموت بغلها
مهدي بن مسفر بن عليان الحبابي