أرض الحرم

ننكر على شارون والعيب فينا
فينا جماعات مشت درب شارون
تقتل عساكرنا وتزمر علينا
بافكار منحرفه وتفجير وجنون
لا بالله انا يا عرب ما غزينا
شلة شباب وحسب الاهواء يفتون
تبّت يدا من يدعم المجرمينا
من عظم جرمه قلب الإسلام مطعون
يا لزمة النجسه متى تنتهينا
ندعي عليكم والملايين يدعون
من مات جعله باسفل السافلينا
والحي ما يلقى له دروب بالكون
إلا الهدايه والطريق المبينا
واما حصل باسرع من البرق تفنون
روعتوا السكان والآمنينا
ساويتوا الكفار باللي يصلون
فرحتوا العدوان والشامتينا
وافكاركم عميا ومن دون في دون
أرض الحرم والركع المسلمينا
لا صاح واحدها يجاوبه مليون
ياما احضنتنا من قديم السنينا
واليوم يوم الشعب والشعب مديون
ملزوم نحضنها ليا جت تبينا
نرفع علمها عن عبث كل مجنون
يا دولة الإسلام لا تحزنينا
دينك وعرضك عن معاديك مصيون
يامير نايف مع يدينك يدينا
متعاهدين وخاين العهد ملعون
مع شلة الارهاب لا تستهينا
اضرب بحد السيف طلاب شارون