وحيد

يا لا يمي وش في يدي؟ مثلي انا وين بيروح؟
تعبت اجاري دنيتي بس الأسف ما به جديد
عذولي!!.. وريح التعب ريح على وجهي يفوح
قل لي وش اللي لي بقى غير الصبر بس ما يفيد
عمري توسط وانتصف ما عشت به لحظة فروح
واسمي «سعد» مير السعد عن سكة امثالي شريد
شلت القهر عمر ودهر مير الزمن كفه شحوح
مستخسر البسمة عليّ لو لحظة من يوم عيد
وكل خذلني ما بقى في هالملا خل نصوح
واحرقت ليلي بالسهر على أمل صبح يجيد
وكل شي مات بداخلي إلا الحزن له ألف روح
كم حل ليل وطاف ليل النوم عن عيني طريد
يكفي ودونك نظرتي!! تكشف لك أسرار وجروح
فيها تفاصيل السنين اللي دعت مثلي وحيد
والشعر لو ف اذنك صرخ فاعرف ترى صوته بحوح
ما يوصل حدود الشقا لو نسبة أبياته تزيد
بالصمت ابا اجمع حسرتي لو عيني افواه تبوح
وأقرب وأمارس وحدتي وأبعد عن الدنيا بعيد