راعي الهودج

كن فرقاك ارض جرهديه
يوم قفيت كنك تسحب اخطاك
رحت ادورك يمكن لك بقيه
مالقيتك ولكن من بقاياك
عطرك اللي نسيته في يديه
هيض القلب عطرك قلت وش جاك
قال: رده قبل لا يروح ليه
قلت ما هو مطول يوم خلاك
كلها ايام.. ويعود عليه
كيف لو هو درى عن سر مسراك
كان يمديه ضاق.. ومات فيه
يا حبيبي وش الدنيا بلياك
روحوبك على هودج مطيه
ما يهاب الولد قولة تقفاك
بس لك في خفوقه مقدريه
ردته عنك يوم الناس تتلاك
كنه اللي مسوي له خطيه
هي خطيه ياراع الهودج اهواك
هي خطيه محبتك البريه
ايه ابخطى واموتك حب واهواك
لو بعدك الليالي سرمديه
تدري انه ليا احد جاب طرياك
قمت اصدد.. عشان الهاشميه
ما ابي يعرفون انه تعشاك
ذيبك اللي عوى بالمهمهيه
يا حبيبي وانا لولاك.. لولاك
كان يمدي لي ضلوع خليه
الله اللي زرع حبك ووداك
شرع ربي وذي سنّة نبيه
مرك الغيم والا قد تعداك
عقبك العين كن ابها ابرديه
اذكرك كيف تبغى اذكرك وانساك
يذكر الهيل فوح الشاذليه
شفني ارقد على لجة هداياك
وش تبيني اسوي بالهديه
انت ما تدري انه يوم فرقاك
يوم ماله شبيه الا المنيه
ما بقى الا اصوت من سواياك
زملوني.. ترى الحاله رديه
وانت يا غايب ان كان الله احياك
طالبك لا تطولها عليه
بدر الظاهري