إنجاز بطل القرن في عيون الشعراء

لايزال الفوز الهلالي الرائع بكأس المؤسس أنشودة ممتعة يتغنى بها الشعراء الذين عبروا من خلالها عن سعادتهم الكبيرة وفخرهم بهذا الإنجاز الذي حققة فريقهم زعيم القرن وعملاق المئوية وبطل الأبطال,, وهانحن ننشر مابعثه لنا شعراء الوطن ومحبو بطل القرن.
***
ياهلال المجد
ياهلال المجد مجدك مايغاب
في سماء ليل البطولة والنصر
دوم بالقمة مثل ذاك السحاب
لو تهزك ريح ماتنزل حدر
بالجدارة تخترق كل الصعاب
ماتزعزع لاصبح الموقف خطر
كل لاعب فيك يحسب له حساب
الله اكبر كلهم عزم وصبر
شوف سامي لانطلق مثل الشهاب
يجعل الحراس في حالة ذعر
اشهد انه بالفعل ذئب الذئاب
للفرص نهاز بالعب وحذر
ياحبيب الكل قولوا ياشباب
النجومية على مثله حصر
والنمر يوسف مثل سر الكتاب
فك رمزه من قبل خصمه عسر
وخالد اللي باللقاء يرفض يهاب
يندفع كنه على صفقة عمر
والدعيع للخصم مثل السراب
ضاع جهد الخصم من صده هدر
والنجوم اللي حضر منهم وغاب
كلهم أبطال عالين القدر
عبدالله مطلق المطيري
***
يبقى لهم حتى يجونك 100 عام
مبروك ياهلال الفخر والبطولة
طعم الفرح يبقى على طول الايام
يازين لعبك كل صوله وجوله
دائم على جلب البطولات عزّام
خلّيت خصمك يرتمي في ذهوله
كل الخطط راحت على خصمك أحطام
من يد عظيم المنزله في مثوله
أخذت كاس اللي حكم دار الاسلام
اسمه ورسمه حط بالقلب دوله
اكبر كثير من المشاعر والارقام
بك من عبير المجد مسكه ولوله
يارافع راسك على الفوز قدّام
يا أغلى فريق إلى ظهر صفقوا له
ما فيه مثلك ياعطر كل الاحلام
لك في دروب اللعب فن ورجوله
والقرن سجل لك بطولات وافلام
ياسلسبيل أجمل فرح في حلوله
لك رايةٍ غطّت على كل الاعلام
أنت الزعيم اللي تبرهن افعوله
زعيم في كاس الموحد لك وسام
وصفك تجي منه القصايد خجوله
لكن شعور ورشّته روس الاقلام
نادي عظيم ولافريقٍ يطوله
يبقى لهم حتى يجونك مائة عام
ناصر بن حسن الغنام
الطائف
***
هلال البطولة
مبروك فوزك ياهلال البطولات
في كل مره فايزٍ فالبطوله
ياهلال ماغيرك لنا كل الاوقات
يجلب لنا أفراح الهنا في حلوله
فوزك بنى كل القصائد والابيات
بالصعب فوزك مايجي بالسهوله
فنّك ولعبك فرحتن تشعر الذات
في طيب معدن عاشقين الرجوله
لك منزله ماتنحسب بالمسافات
فوق الثريا منزلك من بطولة
كاس المؤسس مايجي بالسهالات
رفعت كاسه واستوى في مثوله
هاذي مائة عام مضت والبطولات
تفخر بقربك ياهلال البطولة
تركي بن خالد القباني
الطائف
***
هنيت أنا اللي بأزرق اللون مفتون
بمناسبة فوز نادي الهلال بكأس المؤسس,, يوم الاربعاء 10/11/1420ه تهنئة لرئيس النادي الامير بندر بن محمد وأعضاء الشرف ولاعبي وجماهير النادي,.
زعيمها يهلالها يا أزرق اللون
كأس الزعامه سلَّمه لِك فهدها
كأس المؤسس ماوراها ولادون
شربت ماها ولاعطت من وردها
عبدالعزيز اللي له الخلق يدعون
يالله عساه ابجنته عن لحدها
يمعذربين إهلالها وش تقولون
روس الحبال إيحلها من عقدها
كل يشوف الكاس وانتم تشوفون
في ليلة ماقبلها ولابعدها
فيها (الفهد) حيا اجموع ايحيون
ليلة تغيظ الضد كل شهدها
احفاد ولد اليوم صعب يحضرون
من بعد مية عام ياتي وعدها
هذا الصحيح ولابها شك واظنون
حقيقة يحرج بها من جحدها
هنيت أنا اللي بازرق اللون مفتون
من شجعه ماعاش يوم ابنكدها
اسمه على اللي بالدجى نور الكون
به سولفت هاك العجوز الولدها
كم من بطولة نالها ابلعب وافنون
عشرين مع تسعة اجمالي عددها
بندر وسلطان الوفا مايمنون
بالمال والتشجيع وايضا جهدها
مع الوليد اللي به الناس يدرون
ماحسب أموال المجده نقدها
وجمهور مخلص دوم خلفه يسيرون
كالموج الازرق مايوقف مددها
يهل النوادي كلها لاتهونون
زعيمكم هنوه واصحوا حسدها
هنيت أنا وشاركت ناس إيهنون
واوقفت قاف غايته ماوجدها
ياسر بن فهد عقيل الطويلان
بريدة
***
كأس أغلى الرجال
إهداء لعشاق الموج الازرق بمناسبة فوز نادي الهلال بكأس المؤسس المغفور له الملك عبدالعزيز بن عبدالرحمن رحمه الله
أرعدت وابرقت وارتجت الأرض
وخرج من وسط نجد سيف صقيل
الكل قالوا وش هالصارم البتار؟
طلعت الشمس وتبين انه عبدالعزيز
صدى صوته يقول ماياخذ الكاس
إلا رجال يستحقون رفعته
من يد من وصيته على حفظ البلد
وهذي وصية مني توارثوها للأبد
إنتخوا مغاوير بني هلال
وقالوا وين يروح كاس أغلى الرجال
بنحط رمز البطل بقلوبنا ونسَكِّر عليه
ونضيع المفتاح ولا عاد أحد يلتقيه
ومن بغى يشوفه بنظره عابره
بنو هلال شهامتهم حاضره
عاشق الموج صالح الجوير
***
هللوا له
الهلال اللي خطف كاس البطولة
صفقوا له هللوا له ياهلالي
فجروا الملعب على عرضه وطوله
قلعة الكيسان حطمها الهلالي
واصلوا الفرسان جولة بعد جولة
لاتمل ولاتكل ولاتبالي
الخصم من بعدهم يسحب فلوله
الهلال هلال دايم في العلالي
يازعيم للنوادي من يطوله
في مهاراته وفنه مايطالي
وفي الختام اليوم يالله صفقوا له
من على الساهر نبارك للهلالي
الهلالي المنصور
مرات
***
صقور العرب
بمناسبة حصول نادي الهلال على كأس المؤسس يرحمه الله ابعث لهم كل الحب والتقدير ويسعدني المشاركة بهذه القصيدة:
ماهي غريبة فوزكم بالبطولة
وانتم صقور العرب بكل الميادين
الهلال لالعب ما احدٍ يطوله
اسألوا الجمهور واللي مهزومين
ياناس علموا الخصم وقولوا له
خسران خسران من عاند شياهين
كوره من سامي لجاسم مرسوله
سجل بها قول اسعد ملايين
على القوس هجمات الخصم مشلوله
خليل والشريده درعٍ متين
وللثنيان بالملعب صوله وجوله
ونواف والشلهوب لبعضهم مكملين
وبالوسط خميس والدوخي من حوله
والغامدي عمر بفنهم متفاهمين
وللجمعان عبدالله ادوار مجهوله
داخل الملعب والغير ماهم بدارين
من وراهم محمد زاهي طوله
أسد آسيا وحامي العرين
الكاس من غير الازرق ينوله
مايرضى بالفضه من قديم السنين
خذى الذهب هلالنا صفقوا له
افرحي ياجماهير دايم فايزين
الهلالي علي خليفة الغضبان
مدينة حائل
***
الكأس كأسك يازعيم النوادي
السلام عليكم ورحمة الله وبركاته: وبعد فهذه القصيدة تعبر عن فرحة جماهير الزعيم بتحقيق كأس المؤسس:
ياهلال ماقصَّرت حققت الاحلام
وافرحت جهودٍ هتف لك ينادي
إنت الزعيم بنثر الابداع رشام
ترفعك للعليا كريم الايادي
والله مايزها لكاس المية عام
الا انت ياهلال عشقت العنادي
فيك الزعامه ترفع الراس والهام
وتوجتها كاس الزعيم القيادي
عبدالعزيز موحد الشعب مقدام
اللي حكم بالدين شرع ومبادي
عبدالعزيز القائد الفذ الامام
اللي ملا عدله قلوب العبادي
واخذتها من يد فهد ذخر الإسلام
من كف أبو فيصل حبيب البلادي
ياهلال مامثلك على الفوز عزام
كاسك جديد وانت تزها الجدادي
كاس المؤسس غاليه رمتها ريام
وحققتها ياهلال لاما انت عادي
تفخر جماهيرك على رؤوس الانام
ويشهد لفنك كل راي حيادي
من قابلك ماتنفعه كثر الاوهام
ومن عاندك باللعب لاشك غادي
موج تضيع علوم خصمه ليازام
يكفي من اسمه صاب خصمه رعادي
شرهان الاهلي واغرته زيف الاقلام
وصدق وجا فرح يجر العتادي
ما ادري نسى اوصابه غرور وهيام
وقام يحلم بالكاس كنه وكادي
مايدري إن الكاس دونه بني سام
ولأجل الهلال الكل منهم يفادي
إخلاصهم واضح ومجهودهم تام
ما استسلموا للنقص والعزم زادي
وصالوا وجالوا واطربوا والسعد قام
حتى صحى الحلمان عقب الرقادي
وش عاد لوعضوا على روس الابهام
وهلوا دموع سيلت كل وادي
دامه خسر من عاتي الموج مايلام
ياكثر ماتغرق بموجه نوادي
هذا الزعيم اسال عنه نصر الإعلام
واسال عنه باللعب كل اتحادي
فوق الجميع ومركزه دوم قدام
واضح ولا يلجأ لذر الرمادي
زعيم تشهد له بطولات وارقام
واسمه على مسماه والفعل بادي
زعيم مايهتم من كل الاقزام
لوحاولوا يكسون نوره سوادي
ولاهي غريبه فوزك اليوم مادام
الكاس كاسك يازعيم النوادي
يوسف بن خالد
عاشق الزعيم
***
ألف مبروك
جينا نبارك للهلال البطولة
ونشاركه في فرحته والمسرات
هذا الزعيم الكل يعرف افعوله
متعوداً يحصد جميع البطولات
وقت الصعايب يرتكي للحمولة
وإذا يلعب بفن ومهارات
بمجهود بندر والعزم والرجولة
ومعه شباب يرفضون الخسارات
الكأس ما جاهم بيسر وسهولة
جاهم بفعل رجال قد المهمات
مقصودهم كأس المؤسس حصوله
من يد قايدنا عريب السلالات
ما خاب ظن اللي احضروا واتعبوا له
اللي من أجله ما احسبوا للمسافات
أحلى مواويل الفرح اعزفوا له
جمهور مخلص له في كل المجالات
ارسلت شعري واتمنى قبوله
ومعه تهانينا ومن الورد باقات
فوزية البلوي
الرياض
***
غير كأس البطل ما نرضى
أبغير كأس البطل يا هلال ما نرضى
هندس أبيبان قلعة معقل الشده
قهر قلوب غليله وفرح المرضى
بقذائف ترمي الحارس ورى القده
بطولة القرن حققها لنا سترضى
كأس البطل ما يكون إلا البطل قده
من حق جمهور الأزرق لا حضر يرضى
لاشاهد الكأس قائدنا الفهد مده
لو تلعب الجن مع فرقة هل الارضى
أطيور أبابيل أعدة قبله العده
ترمي صواريخها بالطول والعرضى
تقود هجماتها للباب مرتده
تفرض عليه الدفاع الى هجمت فرضى
ترسم وتصنع له أهداف على قده
الفوز من حقها غصب ما هو برضى
لو الحكم والمساعد وقفو ضده
سعود بن عبدالله المبيريك