ناقضات العكاريش

اللي تنظف كل يوم جسدها
تبغي تماري ناقضات العكاريش
في كل ملفاح تنقض جعدها
العيد عيد الله ولو فات حتيش
من حسبة ايام يمرك عددها
نبي نعلمك المساري على الجيش
مشي ذلولك لين يفتر جهدها
خابرك مانتب ضاري للمطاريش
نبيك تونس حلوها من نكدها
ليله على مسرى وليله مغابيش
وليله نخلي نومها لمن رقدها
وليله على تمره وليله على عيش
وليله نوكلك اللحم صيد يدها
يا علي لاجيت العرب لاتجي تيش
خبل ليا جاب السوالف سردها
إحفظ لسانك لا يجي فيه تبطيش
تصبح عيونك كايدات رمدها
يجيك من ينشدك نشدة تكديش
يبي يسنع هرجة يعتمدها
خله يقوم مفلت في يده ريش
يروح منك وحاجته ما وجدها
ترى دعابيل الخبول الفوانيش
تبدي بما فيها ولا احد نشدها
يجيك واحدهم يورش توريش
سحابته يسبق مطرها بردها
واللي لغمقات السوالف مناقيش
قراية الكلمة على اول عددها
تجي سوالفهم ضحك وتبهيش
وقلوبهم ما احد يفكك اعقدها
صقر النصافي