كم أحبك؟

اسمحيلي أوصفك وأشرح كم الخافق يبيك
اسمحي ودّي أفضفض أثري إحساسك شوي
وان سألني كم أحبّك: تلقي إحساسي يجيك
طالبك بس أسمعي ثُم أحكمي تالي علي
ناظري صحراء خفوقي واحسبي كم ترتجيك
واحسبي مقدار صبري تحت شمسك دون فَي
واحسبي في ليل بُعدك: كم دمعة تحتريك؟
تنتثر من فوق خدّي رافضه مسحة يدَي
أحسد النسمة ليا لفّةْ نحولك: تحتويك
ليتني نسمه وأكوّن بالمشاعر أحلى زَي
كل قطره بالسّما بس ودّها تنزل عليك
تنتحر من فوق غيمه لجْل تلمس منك شي
غرّتك، شعرك، رموشك، حاجبك، غمّازتيك
وجنتك، سيفك، عيونك، وجهك اللي شع ضَي
ريحتك، عطرك، شذاك، وشكل حنّاك بيديك
رقّتك، صوتك، شفاتك، وردك اللي كنه حَي
إيه أحبّك، وأعشقك، وأحيى على شوفك، وأبيك
إيه أنا من دون حبّك: زرع ذابل دون رَي