ليتني أطير

آه من قلبٍ تهب به ألف ريح
كل ما جانا من الغالي رياح
يا شماليٍ وطا ذاك المليح
خبّر المشتاق عن هاك الملاح
يا عسى من حاز قلبي مستريح
ياعساه بخير والخاطر براح
والله أنه نازحٍ قلبي نزيح
واستحلّه كود ماهو بالسلاح
لو وقف دمعي ترى قلبي يصيح
لا تغرّك بسمتي والانشراح
ودي أخفي ونة القلب الجريح
دام سدّي ما بعد بيّن وباح
هيه ياحظ ٍعلى مثلي شحيح
كل ما جيت أنهضه جاوب وطاح
والصحيح أني زهقت من الصحيح
والصبر من واجس الولهان فاح
قالوا إن الزين عزّم بالنزيح
ناويٍ يرحل إلى بان الصباح
من وردني هالخبر وأنا طريح
ليتني أطير وارفّ الجناح
وأنص من شوقه نضح دمعي نضيح
كود مع شوفه يطيبن الجراح
تل قلبي تل تلاّل السريح
والجمل تلاّل والمارد رماح