أول العمر

الضيق ضيفٍ... زارني ما دعيته
يومه غمرني في وفاه... وغمرته
إن ما عمرت من اصدق الشعر بيته
وإلاَ سكتْ... ولا غلطت ودمرْته
جرحي... وله مني صبرت ورضيته
وحزنٍ ملى عيني... لعينه ذخرته
الوقت تنقل هرجة الناس صيته
وأنا ما أشوف إلا ترزّم غبرته!
ليته تجمّل ف... أول العمر... ليته
إن كان يمديني رضيت وشكرته
كم قلت لي شيءٍ وانا مابغيته!
وكم شيء أبيه... ولا قويت وذكرته
...إلا غرامك لا سرحت ولقيته
في درب بالي دون ما أشعر نثرته
على الورق يمكن لو انك قريته
تدري عن اللي في غيابك شعرته
جفني على جمر السهر كم حديته
وقلبي على رمضا الرجا كم جبرته
وإذا سهيت ومال دمعٍ كنيته
صديت عنه وقبل ألومه عذرته!
كلٍ عرف جرحك... وأنا ما حكيته
أخاف أقوله واعتبرني"هجرته"!
خلّه بصدري... كل ما ضقت جيته
وإلا متى ما جيت ف... البال زرته
إلى هنا... قل لي: وش اللي نسيته
عن حال حالي في غلاك وخبرته!
إلى هنا...ما قلت شيءٍ بغيته
واللي عجزت... ولا قويت وذكرته
علمٍ يخايلني.... وأنا ما سقيته
أخاف يظهر... ونتقاسم ثمرته!