دقات قلبي

هويت الشعر من صغري هويته
وبغيت أجحد غلاه وما قويته
عشيرٍ صار عشقه غصب عني
مع العربان.. بان وُذاع صيته
أشوف الشعر روحي واكسجيني
وأشوف الشعر نبعي لا ضميته
وأشوف الشعر هو دقات قلبي
تروق وتنتظم لامن قريته
وأشوف الشعر هو منفس همومي
وجليس الأنس لامنّي دعيته
وصديقٍ من عرفته ما هجرني
يجي وقت الشدايد لابغيته
يواسي حزني ويمسح دْموعي
ويشرح خاطري لازان بيته
يشاركني الفرح في كل ساعه
يذكّرني حضوره مانسيته
يجيني مندفع لازاد شوقي
وعلى حسّ الغلا والود جيته
فديته شعري وجملة حْروفي
غلاي وذاتي وعمري فديته
شاعرة نجد