الجادل

خطٍ وصلني فز له كل معلوق
حتى خفوقي فز له واحتفابه
من شاعرٍ في المعرفة رايته فوق
ترضخ لأحاسيسه حروف الكتابه
يا مرحبا ترحيب عاشق بمعشوق
من بعد ما طال الغياب التقابه
يا أبو سماهر ونت لك قدر مرموق
آخ وعزيز ودعوتك مستجابه
من قدركم سقت الوفا يمكم سوق
وأصبح منوخ عند بابك ركابه
فتحت كنز القاف صندوق صندوق
وأفند المكتوب جابه بجابه
الجادل اللي تسلب العقل برفوق
ذيبة وتحرصها عيون الذيابه
نحنا حميناها من الغدر والبوق
أيام كانت في الجزيرة حرابه
ما دام واديها من الوسم محقوق
لابد ما تلقى رسوم الحيا به
وحنا ولو غبنا نراقب على السوق
نشوف سعر البيع والمشترى به
وإذا دعيتونا نسوق الوفا سوق
والفعل واضح والمواقف تشابه