ويني ووين العيد‎؟..

( ويني ووين العيد ) نص شعري متجاوز الابداع خصت به الشاعرة الجميلة عبير بنت أحمد قراء ( ملامح صبح ) ومع شكرنا للأخت الشاعرة (عبير) على حرصها وتواصلها معنا ندعوكم لمشاركتنا قراءتها حيث تقول:
وانا ويني ووين العيد دامي~ = عجزت اوصل هوى الروح ومرامي
ولوّي بين أحبابي ولكن~ = محد يسواه مع كل احترامي
ولا غيره ترى يملا عيوني~ = وانا في صحوتي والا منامي
ومن وين التفت حولي لقيته ~ = عسى ماينجرح منّه صيامي
سرق عقلي قبل قلبي وروحي~ = وخلاني أحبه هالحرامي!
كأن الحظ صحصح بعد نومه~ = وجابه رميةٌ من غير رامي
يطير لصدري ان شفته حمامه~ = مثل ما طار له قبلي حمامي
حبيبي كلمةٍ منه تخلّي~ = سرور القلب معشب ومترامي
حبيبي كانه معلّق فؤادي~ = فأنا طقيت في قلبه خيامي
وانا ادري به لو ان الامر بيده~ = زهد فالكون واسرف في غرامي
وكم عاشق من الطاري عشقني~ = اجل وشلون من جت له سهامي
رهنت الوقت والناس وظروفي~ = وخليت انتظاره هو دوامي
وأنا ادري عن غيابه، وانتظرته~ = وتبرد قهوتي والشوق حامي
يزعلني، وأرضى بإبتسامه~ = أقول اقواه، وارجع في كلامي
يشوف شلون شوقي في حضوره~ = ويسألني اذا طوّل : علامي؟!
ولاحدٍ لايمٍ ضعفي ونحفي~ = وانا من دون سقياي وطعامي
على الله يجتمع شملي وشمله~ = وغيره بلغوا الدنيا سلامي
ولو أمسك زمام الشعر عنّه~ = فعنّه مستحيل أمسك زمامي