دنيا السعادة والغثا- الشاعر سعيد بن سعد بن عمر

دنيا السعادة والغثا
عبدالله احمد قال هات القصايد=ويش آخر اللي قلت من زين الأمثال
قلت العفو من رب كل العقايد=ارجو ثوابه عالمٍ غيب الاحوال
ربٍ على خلقه وليٍ وسايد= اللي فرض سورة تبارك والانفال
من بعد هذا يا صدوق الوعايد=حالي تسرك كان تنشد عن الحال
انا احمد الله عندنا الخير زايد=امن ورخا واسلام وارزاق وعيال
ستر ومحبه في دروب الرشايد= والعافيه لا شك هي روس الاموال
ودنيا العنا لا بد فيها نكايد=ولا بدها تجري على كل رجال
احدٍ من الراحه يسوم الوسايد= واحدٍ عليه الوقت جاير وميال
قد صابني منها لهيبٍ ووقايد=ياما وياما لوحت بي على الجال
دنيا السعادة والغثا والنقايد=الناس فيها عاشت ألوان واشكال
فيها رجال العز واهل العوايد=نطاحة الماجوب ذربين الافعال
واهل الحيل ومدورين الفوايد=فيها بكثره جعلهم قصف الآجال
وفيها ضعيف النفس راعي الزهايد=من شاف زوله قال فارس وخيال
وفي المجتمع ناسٍ تشيل الحقايد= نقالة الهرجه رديين الاعمال
اهل الفتن ومروجين الفسايد=قد حذر الاسلام منهم ولا زال
والله له المرجع وبالخير جايد=له حكمته بالخلق نازل ورحال
والرابح اللي من غثا الوقت نايد=حاله بحاله في رجا عالم الحال
وصلاة ربي عد نو الرعايد=على النبي اعداد ما هل همال
الشاعر / سعيد بن سعد بن عمر