ورينا شطارتك الحين!

ما احب اطير مع العجة لكن اللي اشوفه ان لائحة النشر الإلكتروني هذي جت في وقتها من جد، أجل بتبقى الدعوة خذني جيتك وكل من صمم له منتدى بعد يومين قال عندي صحيفة إلكترونية وصار ينقل اخبار، بصراحة من اول كنا نشوف هالفوضى وساكتين، وكل ما تكلم احد قالوا انت خايف من عصر التقنية ومن ثورة الما ادري وشو، لا اجل نخلي العالم تفلها وتقلب الاعلام سواليف، والاشاعات معلومات، وكل واحد يكتب خبر صحفي من وجهة نظره هو وتلاقي اكثر من نص الخبر تأليف من عنده والباقي رايه في الموضوع، ومن زين الطبايع يكتب لك علمنا من مصدر موثوق عشان يفهمنا ان السالفة صارت من جد وان فيها اخذ وعطا، واذا جا يحط رايه قال «ويرى مراقبون»..الا وش رايك بعد تحط صورتك في الخبر ورقم جوالك وتكتب تحت لمزيد من المعلومات عن السالفة يرجى الاتصال!
الحين صارت الامور واضحة، واللي يبي يكتب شي يبي له يكون عارف وش هو بيقول بدل ما يجلس يخترع اخبار ويخرش الناس، ويقال له راعي إثارة صحفية، والا تلاقيه لقط كلمة عادية من واحد مشهور، وراح طقها مانشيت وجلس شهرين يحارش فيها مشاهير غيره، بالعربي..اللائحة تقول لهذولي: رح سولف شات احسن!