الشعر والشهرة

نص مورق بالأفكار وزهور العشق، كتبته الشاعرة المميزة تاج الغرور بحس مرهف، وأدوات شعرية قوية، تؤكد في كل نص أن هذه الشاعرة قادرة على مقارعة أقوى الشعراء.
القلب ياصاحبي لفراقكم مكره
مسلوب دمه ونبضاته وهو حيا
المشكلة في خفوق ما عرف يكره
لا جيت له من هنا يذكرك منيا
يردني لك حنين جامح بطهره
مزروع بين الحنايا منطوي طيا
الحب غيث (ن) همى والشوق يا كثره
والعشق طفل(ن) ربى من ضحكة امحيا
ما قلت لك كم دعاني الشوق من فتره
ما شفت لوني شحب واشتقت للفيا
يا عل غصن السعادة يورق بفكره
تسقي حنايا الضلوع وتنبت هنيا
وتظلل اعروق عطشانه ومنكسره
تحتاج وبل السحاب ليبسها ريا
يا صاحبي لك بخون الكل من بكره
وأجيك ادور وطن في غربة اجفيا
ابيك تمحي براد الروح من جذره
وتبلل اوراق ذبلانه تبي الميا
وتعلم الورد وش له ينتشي عطره
وش له نحب البياض ونعشق الضيا
وش له نحب السهر ونسامر القمره
وش له نعيش الجنون بطيش(ن) وغيا
في ذمتي ما نسيت الحب والعشره
واصلا خفوقي على نسيانكم عيا
لجلك أبيع الصخب والشعر والشهره
ولو قلت لي هاجري بقول لك هيا