شحوب الزوايا

اعروق قلبي في غيابك ظمايا!
حاول تبلل نبضها لودقيقه!
جرب تقيس الشوق وسط الحنايا!
ترى إجتياح العشق محد(ن)يطيقه!
شف زرع حبك نابت(ن)بالخلايا!
اقتات به واتنفسه واستذيقه!
وإن ماكفاك الشوق قل للبرايا!
أن الحياة ابلا تواجدك ضيقه!
من رحت عني والمواني عرايا!
مالفها لون الشفق في طريقه!
أمست مداينا بدونك قرايا!
ماتت معالمها وباتت سحيقه!
واضح بنا حتى شحوب الزوايا!
مع عتمة الشباك صارت عتيقه!
حتى المكان اللي يثير الحكايا!
اصبح بدون ارضاك فاقد بريقه!
ماعاد يطربنا حنين الخفايا!
ولاندور في سرابك حقيقه!
أما تجي وتمد بيض النوايا!
وتسقي حنايا خافق(ن)جف ريقه!
وإلا بلاش من الكذب والهدايا!
روّح عسى تلقى بدالي رفيقه!