سهم النظر

ياللي عيونك ماتهاب وتاوي
سهم بلا رامي ورميه قوه
ماني على نظرتك والله قاوي
مدري هوى وألا علي اتموه
سهم النظر دايم قوي وكاوي
صد النظر لن كان فيك امروه
لي قصة لوقالها لك راوي
تعرف غرامي كيف عايش جوه
وتدري بأني عاشقٍ له هاوي
قلبي سكن في داخله من جوه
روح وأنا للحب ماني ناوي
بعده ولو كذب عليك امفوه
ماحب غيره لو برق لي ناوي
عهد عليه يوم يبرق نوه
صار الزمن من غيبته متساوي
ماعاد أفرق بين خير وسوه
صحيح غاب ولالقيت مداوي
من الهوى قلبي موّلع ضوه
لكن حبه حاضنٍ له وآوي
حتى مايفرح عاذلي وعدوه
وأنا أنتظر متى يجيني ضاوي
ضي الفؤاد وغايته ومنوّه
لاتحسبني جيت لك متهاوي
ماحدن وصل له في مدى وعلوه
روح لمن قلبه فضى وخاوي
واللي تريده فيه بالله سوه
وان كان عينك ماتهاب وتاوي
صفحتك يوم امشي ترى ممحوه
متعب العتيبي