يالطيف الروح

يالطيف الروح حبك نابت بين الضلوع
مثل غرس نابت في وادي ماباح ماه
تربته من قلبي المجروح وماه من الدموع
والضلوع اللي سكن فيها تصونه وتحماه
عاش في ذيك الليال الماضيات اللي تروع
بين هم وبين حزن وبين خوف وبين آه
حافظينه بالسنين وبالشهور وبالسبوع
ماحد يدري عن اللي شايله قلبي وراه
وانت ناوي بالقطيعة مانشوفك يالقطوع
ناوي تذبح خفوقي واعنا قلبي عناه
ما ترجينا الطماعه والطماعه للطموع
شوفتك عندي تراها مكسب القلب ودواه
والله إني يالطيف الروح رجال قنوع
ماطلبتك كود نظرة من بعيد وبالعباه
والعواذل لاتحط اذنك لها عبد سموع
كل عاذل يالطيف الروح ياكله حصاه