جمرتان وصقيل

العيون الجوارح من رآهن يضام
دام ماله مبات بظلهن أو مقيل
رمشهن ما يفكر في حلال وحرام
لانوى القتل يقتل لو قتيله دخيل
بالهوى غصب عنا يكسب الاحترام
خوف لايبتلينا وانترجى ذليل
كن شانه عظيم ومن سلالة عظام
عرش حكمه شموخ بواقع مستحيل
إن تظللت ظله قلت: طاب المقام
وإن غشاني هجيره ماتماكنت قيل
يا يصب المشاعر مثل صب الغمام
يايخليك تكفر بالهوى والخليل
يالهنوف الكحيله صاحبك مايلام
لازرعتي بصدره جمرتين وصقيل
في عيونك مجازر من حروب الغرام
تحكي ألفين قصه عن أسير وقتيل
واعذاب الهواوي لا وصل لك وهام
رمش عينك يجيبه لانوى بالرحيل
فيه حسم المصير وفيه حد الحسام
وفيه روحن تعلق بين قمرا وليل
وفيه حكم الطغاه بشعب كله كرام
وفيه مد الكريم اللي كواه البخيل
مستحيل يتقيد في أمور السلام
الغدر من طباعه والضحايا دليل
شفت برقه ينوض وشفت فيه الظلام
يمطر الليل الأسود في هدبك ويسيل
نظرته عمرتني وتركتني حطام
جيت عابر سبيل ورحت عابر سبيل
* متعب النصار
* إضاءة: هذا الشاعر الشعبي الجميل.
ينشر للمرة الأولى «المحرر».