عندي طلب..!

يوم جوي مع اللي تل قلبي صفا
قلت عندي طلب قال انت لك ما تريد
قلت لا صار بعدك برد ودّي بالدفا
قال قربي ثواني قول لي وش يفيد
قلت لا صار شوقي داء شوفك شفا
قال وش بعد صومك، قلت لا شك عيد
قال فابشر بعيدك ثم وعدني ووفى
وابتسم في لقانا وقال عيدك سعيد
قلت حسنك على حسن الخلايق ضفا
قال ذا شي طبيعي جيب شيءٍ جديد
قلت نور البسيطة عقب نورك طفا
قال حكيً سمعته وانت جالس تعيد
قلت غمض، وغمض لين رمشه غفا
فوق خده وعقلي في وصوفه شريد
قلت رمشك على جدول ورودك طفا
وذاب قلبٍ حسبته قبل اشوفك حديد
قال يكفيك شوف، وقلت له ما كفى
وكل ما قال يكفي قلت هل من مزيد
لين قفّى وقلبي من حشاي اختفى
يحذفه بين يدّينه من ايدٍ لأيد
جعل ما يكون بيني وبين وصله جفا
وجعلني طول عمره في حياته وحيد