لآلئ شعرية

عديت لي رجم على راس نايف
باقي رسومه للبلى مستهيلة
مبناه شرق اللي على الخيف لايف
وايمن مسير اللي يجي للنفيلة
وقفت به وانا وقوفي كلايف
وارخيت له عن عبرة العين شيلة
له جابني من ماضي الحب طايف
يوم الهوى صادف نفوس بخيلة
ماني على المقفي كثيرة حسايف
ولا نيب للبرق المجنب مخيلة
مادام ما وبله بقاعي ذرايف
وش لي بحروة بارقه كل ليلة
انا وفيت وشفت ماكنت شايف
والحب عفته يوم هذي حصيله
لا ابديتها من هرجة الناس خايف
واليا سكت بوسط كبدي مليلة
لي صاحب لا اقبل ولا هوب عايف
متحير بين الطمان وطويله
على ذلوله موميات السفايف
تبدي لقلبي مابدا من رحيله
ضحكت له وابديت زاه الشفايف
وارويت من نبع المودة صميلة
ان رحت ياكثر الركاب النكايف
ماكل خيال يحوش الكحيلة