روحي بأمان الله

قولولها تاخذ هداياها وترحل عن سماي
بنت الترف ماني بحاجتها تروح مبجله
اللي تبي تشري قلوب الناس ما هي مستواي
ترحل وأنا بقول يا بنت الكرام مجمله
ما جيت أساوم في زحام الحب عن قيمة غلاي
ولا جيت أبسأل عن خطا الايام والا اعلله
انا وضوحي يفضح الاسرار وجروحي وفاي
وانتِ رميتِ قلبي المسكين لاول معضله
يا بنت انا شاعر على قدي وما قدي وراي
لاجيت اعدل حظي المنكوب وقتي ميّله
أنا بدوي على السليقة لا علي ولا معاي
أمشي على وضح النقا تالي زماني وأوله
كنت أحسب ان الشعر والأبيات ما تعرف سواي
جاهل وأنا أعرف اللي صار وأقول أجهله
ما كنت أبي شهرة ابو فراس يكفيني فضاي
ودي احلق عن غثا الاسراب واعلو منزله
وانتِ قريتني مثل ما كان يقراني خفاي
روحي بأمان الله يا بنت الكرام مدللة
وانا بسافر مع جروح القلب وادوّر سماي
وتبقين في دفتر حياة الشعر اسوا مرحله